انصار: (چنګاښ ۲۱ مه)، د طالبانو د بهرنيو چارو وزارت سرپرست مولوي امیرخان متقي په خپل کاري دفتر کې د افغانستان لپاره د ترکمنستان له سفیر خواجه عوضوف سره د ټاپي پروژې د چارو د پيل او یو شمېر نورو موضوعاتو په اړه خبرې کړي.
د متقي دفتر وایي، دې کتنه کې د افغانستان په خاوره کې د ټاپي نل لیکې پر غزولو، تورغنډۍ سټېشن ظرفیت لوړونې او د هرات نورالجهاد برق سبسټېشن د چارو په تړاو خبرې اترې وشوې.
سرچینه زیاتوي: متقي سرپرست هیله څرګنده کړه، چې افغان لوری به هڅه وکړي، چې د افغانستان په خاوره کې د ټاپي پروژې د چارو پاتې برخې مسئلې اوارې او عملاً کار پیل شي.
هغه همدارنګه ويلي چې د افغانستان اړوندې ادارې کار کوي، څو د ټاپي پروژې ټول حقوقي اسناد نهايي او د کار د پیل زمینه برابره شي.
طالب وزیر په دغه کتنه کې همدارنګه ويلي چې د تورغنډۍ بندر کې د اوسپنې پټلۍ اړوند تاسیساتو جوړولو په اړه هم اړونده افغان اداره کار کوي او په نژدې راتلونکي کې به د ترکمنستان لوري ته اطلاع ورکړي.
طالب چارواکو له بیا واک ته رسېدو وروسته بیا- بیا د ټاپي او یو شمېر نورو سیمه ییزو پروژو د چارو د ژر پیل خبرې کړي، خو عملي ګامونه په دې برخه کې نه دي لیدل شوي.
URL تعقيب: https://www.ansarpress.com/pashto/32448
سور صلیب: د افغانستان د اقتصادي سیستم د سقوط د مخنیوي هڅه کوو